LAOAG CITY – Inbilin ni Presidente Ferdinand ‘Marcos Jr. dagiti local government units a siguradwen nga umdas ti suporta ken resources a maipapaay para iti pannakaestablisar ti child development centers iti low-income areas.
Inaramid daytoy ni Presidente Marcos iti panagbitla na iti naiyuswat a ceremonial signing ti joint circular iti nagbaetan ti Department of Education ken Department of Budget and Management iti pannakaestablisar ti child development centers (CDCs) kadagiti kurang iti serbisyo na a komunidad.
Inrakurak pay ti presidente a naestablisar dagiti maseknan nga ahensya ti pakabuklan a 328 a low-income barangay, a maipaayan ti pondo tapno maaddaan dagitoy iti access iti early childhood development initiatives.
Iti nasao a bilang ket 89 iti Luzon, 106 iti Visayas, ken 133 iti Mindanao.
Innayon ni Presidente Marcos nga agingga idi Marso ita a tawen ket adda ti 3,800 a barangay iti pagilian nga awan ti child development centers na.
Sakbay iti ceremonial signing, naaddaan ti gundaway ni Presidente Marcos a nagbasa ti libro para kadagiti ubbing nga agtawen ti tallo agingga iti lima iti uneg ti Palasyo ti Malakanyang.
