LAOAG CITY – Nangiparuk-at ni Presidente Ferdinand R. Marcos Jr., ti Executive Order (EO) 101 a mangibilbilin ti naan-anay nga implementasyon ti Republic Act (RA) 11321 wenno Sagip Saka Act, a mangipatungpal kadagiti programa para kadagiti mannalon ken mangngalap a gagem na a pasayaaten ti produksyon da ken agbalin a produktibo.
Iti babaen ti Executive Order 101, amin a national government agencies (NGAs), pakairamanan ti government-owned or -controlled corporations (GOCCs) ken ti state universities and colleges (SUCs), ket namandar a mangilinya kadagiti programa, aktibidad ken proyekto da nga addaan ti gagem para ti Sagip Saka.
Naibilin pay kadagiti Local government units (LGUs) a suportaran ti implementasyon ti Sagip Saka Act tapno tulungan dagiti lokal a mannalon ken mangngalap a manggun-od ti arapaap da a maaddaan ti napintas a mapastrek.
Ti mandato ti Executive Order 101 ket ti pannakaadaptar ti lehislasion a mangsuporta kadagiti mannalon ken mangngalap a pakairamanan ti capacity building, market access, enterprise support, ken pannakaitandudo ti sustainable livelihoods para kadagiti babassit nga agricultural producers.
Inmandar pay daytoy iti amin nga ahensya ti gobierno a direkta a gumatang ti agricultural ken fishery products manipod iti accredited farmers and fisherfolk cooperatives and enterprises (FFCEs).
Kabayatanna, nabilin met ti Department of Agriculture a mangestablisar ti Sagip Saka desks iti regional ken field offices na nga agserbi kas ‘hubs for information, assistance ken coordination.”
Ti Sagip Saka Act, ket napirmaan tapno agbalin a naan-anay a linteg idi 2019 a gagem na a maipaayan ti bileg ti lokal a mannalon ken mangngalap iti babaen ti pannakairaman dagitoy ‘value chains, enhancing productivity ken panangitandudo ti local procurement.
