LAOAG CITY – Inbilin ni Presidente Ferdinand R. Marcos Jr. ti panagipatakder ti “tent city” iti Bogo City tapno adda ti temporaryo a pagnaedan dagiti residente a napukawan ti balay gapu iti idadayyeg ti magnitude 6.9 a gingined idi Setyembre 30 ita a tawen.
Iti ibibisita ti presidente iti Bogo City tapno personal a kitaen dagiti relief efforts, inrakurak na ti panagamak na iti nalawa a perdisyon dagiti pasdek nga isu met ti pagamkan dagiti tattao nga agsubli kadagiti pagtaengan da, uray kadagiti evacuation centers.
Segun iti presidente, masapol a maiyalisto ti panagaramid ti “tent city” tapno adda ti dagus a pagtalinaedan dagiti umili a napukawan ti balay.
Inpakaammo ti presidente nga usaren ti gobierno ti tulong ti Philippine Red Cross para iti panagikabil da kadagiti medical field tents da, a nausar idi COVID-19 pandemic kas isolation wards.
Inpasigurado ni Presidente Marcos a maipaayan ti kompleto a serbisyo dagiti pagnaedan iti tent city.
Innayon na a siguradwen da pay nga adda ti umdas a supply ti makan, danom ken kuryente no kasapulan ti generator ken aniaman a kasapulan dagiti tattao.
Inkari pay ni Presidente Marcos nga agtultuloy ti suporta ti gobierno para kadagiti apektado a komunidad iti ibabangon ken panagrekobre da.
