LAOAG CITY – Inbilin ni Presidente Ferdinand Marcos Jr. kadagiti ahensia ti gobierno nga aramiden a prioridad ti virtual meetings imbes nga agbiahe para kadagiti opisial a taripnong ken aktibidad.
Iti babaen ti Memorandum Circular No. 114, kuna ti Presidente a nasken nga aramiden nga online ti kaadoan a taripnong, konsultasion ken komperensia dagiti ahensia ti gobierno kas paset ti addang ti gobierno tapno makainot iti enerhia iti baet ti krisis idiay Middle East.
Gapu iti daytoy, dagiti meeting, seminar ken workshop ket nasken nga isayangkat iti secure digital platforms malaksid laeng no kasapulan ti pisikal a presensia.
Nabilin dagiti mangidadaulo kadagiti ahensia a siguradoen nga adda ti umdas a digital infrastructure dagiti opisinada tapno naurnos a maiyuswat dagiti online meeting.
Malimitaran pay dagiti official travel ken magutgutigot dagiti ahensia nga aramiden laengen nga online dagiti aktibidad a mabalin met nga iwayat a saan nga agbiahe.
Sakupen iti pammilin ti amin nga ahensia ti nailian a gobierno pakairamanan dagiti Government-Owned and Controlled Corporations (GOCCs) idinto a maal-alukoy dagiti Local Government Units (LGUs) ken dadduma pay nga institusion ti gobierno a sumurot kadagiti addang iti panagin-inot ti enerhia.
