LAOAG CITY – Inbilinen ni Presidente Ferdinand Marcos Jr. a maarestar ni dati a Cong. Zaldy Co ken 17 a dadduma pay nga opisial manipud iti Department of Public Works and Highways (DPWH) ken Sunwest Corporation mainaig iti maanomalya a flood control projects.
Segun iti Presidente, addan ti inparuk-at a warrant of arrest ti Sandiganbayan kontra kadagitoy a maibasar kadagiti ebidensia nga inpila ti Independent Commission for Infrastructure (ICI) ken ti Department of Public Works and Highways.
Inpettengna a dokumentado ken natibker ti nangibasaran ti kaso a saan laeng a basar kadagiti estoria wenno sayangguseng.
Inbilinna nga insigida nga ipatungpal dagiti otoridad ti panangarestar basar iti linteg, maipasango dagiti akusado iti korte ken mapagsungbat dagitoy nga awan ti special treatment.
Innayon ti Presidente nga isuna ti nangirugi ti nalawa a panagdalus iti flood control anomalies ken isuna met laeng ti manglippas iti daytoy.
