LAOAG CITY – Indeklara ni Presidente Ferdinand R. Marcos Jr. ti Nobiembre 4, kas ‘National Day of Mourning’.
Ti deklarasion ket inaramid ti Presidente para kadagiti biktima ti Bagyo Kristine itay kallabes.
Iti babaen ti Proclamation no. 728 nakailanad pay ditoy ti pammilin ti Presidente kadagiti amin nga establisimiento nga addaan kadagiti bandera nga ikabil da iti half-mast.
Ginutigot na pay ti tunggal maysa a mangidaton iti kararag para kadagiti biktima a naapektaran iti didigra.
Ti Proclamation No.728 ket pinirmaan ni Executive Secretary Lucas Bersamin a napetsaan iti Oktubre 30, 2024.
Maibasar iti datos a linaon ti nairuar a proklamasion, nasurok a 1.7 milion a pamilia ti naapektaran iti Bagyo Krisitne idinto a 139 ti pimmusay.
Immuna iti daytoy ket inkararagan ti Presidente dagiti amin a nagbalin a biktima ti bagyo Kristine ken bagyo Leon agiddan ti selebrasyon ti Undas 2024.
