LAOAG CITY – Inpasigurado ni Presidente Ferdinand Marcos Jr. nga awan ti nayon a presio kadagiti kangrunaan a taraon iti uneg ti 1 agingga iti 2 a bulan.
Daytoy ket kagiddan iti inspeksion ti Presidente iti maysa a dakkel a food warehouse idiay Biñan, Laguna mainaig iti estado ti imbentario ken presio dagiti produkto a taraon.
Segun iti Presidente, aktibo a makikokoordinar ti gobierno kadagiti supplier ken manufacturer tapno masigurado ti agtultuloy a suplay ken saan a madagsenan dagiti gumatang.
Inbatadna nga immannugot dagiti dadakkel a kompania nga agtalinaed pay laeng ti presio dagiti produktoda kas panagkaykaysa iti gobierno iti baet ti agdama a situasion idiay Middle East.
Gapu iti daytoy, namnamaen ti Presidente nga agtalinaed nga stable ti presio ti taraon pakairamanan ti processed goods kabayatan nga agtultuloy ti naiget a monitoring ti gobierno.
Nagyaman ti Presidente iti kooperasion dagiti kompania a dakkel a tulong tapno mapagtalinaed a nalaka dagiti taraon para kadagiti Pilipino.
