LAOAG CITY – Inpasigurado ni Presidente Ferdinand ”Bongbong” Marcos Jr. a nakasagana ti gobierno a mangipaay ti kasapulan dagiti residente nga apektado ti panagbettak ti Kanlaon Volcano.
Iti video message, inbatad ni Presidente Marcos a ti Philippine Institute of Volcanology and Seismology (PHIVOLCS), National Disaster Risk Reduction and Management Council (NDRRMC), ken ti Department of Social Welfare and Development (DSWD) ti kangrunaan a nakatutuk iti agdama a sitwasyon ken mangipaay ti tulong kadagiti residente iti nadakamat a lugar.
Inlawlawag ni Marcos a naipangato ti alert level alarm iti Alert Level 2 tapno masigurado ti kinatalged dagiti residente.
Mainaig iti daytoy, kuna ni Presidente Marcos nga addan ti pakpakauna a tulong a naipaay kadagiti apektado a residente kas kadagiti sleeping kits iti La Castellana ken addan ti 13,000 a family food packs a naka-preposition iti Negros Island ken adda pay nayun na nga 40,000 food packs ken dadduma pay a non-food items a sumaruno a maideliber.
Innayon ti presidente a naka-standby met dagiti air asset tapno al-alisto ti panagresponde dagiti maseknan no kasapulan.
Inkari pay ni Presidente Marcos nga agtultuloy ti panangipaay ti tulong ken suporta ti gobierno agingga a makasubli a natalged dagiti residente kadagiti bukod da a pagtaengan.
Kagiddan iti daytoy, nagpanawagan ni Marcos kadagiti residente kangrunaan na dagiti apektado a lugar nga agtalinaed a naridam ken liklikan ti agturong iti four-kilometer radius permanent danger zone.
Iti agdama, addan ti 23,622 a residente manipod iti lima a barangay iti Canlaon City, Negros Oriental kalpasan ti ‘phreatic explosion’ ti Bulkan Kanlaon idi rabii ti Lunes, Hunyo 3 ita a tawen.
