LAOAG CITY – Inpasigurado ni Presidente Ferdinand Marcos Jr. nga adda ti umdas a suplay iti bagas ti pagilian iti baet ti mapaspasaran nga El Nino wenno nakaro a tikag.
Inbatad ti presidente nga awan ti rumbeng a pagamkan ti publiko nga adda ti panagkurang ti suplay iti bagas ken taraon.
Iti ambush interview iti Occidental Mindoro, kuna ni Presidente Marcos a kas pammaneknek ti panangipasigurado na nga adda ti umdas a suplay iti bagas iti pagilian ket ti panagngato ti naapit kadagiti lugar a nabuslon ti danom na.
Inpanakkel ti presidente a resulta daytoy ti baro a farming techniques ken ti napadur-as nga irrigation system.
Nupay kasta, aminado ti presidente nga ado dagit taltalon a naapektaran ti tikag, banag nga iyar-aramidan ti wagas ti gobierno.
