LAOAG CITY – Inpasigurado ni Presidente Ferdinand R. Marcos Jr. iti publiko nga iyalisto ti gobyerno ti pannakaipaay a dagus ti cash assistance kadagiti sektor nga apektado ti panagngato ti presyo ti langis gapu iti agtultuloy a krisis iti Middle East.
Iti maysa a video message, inbatad ni Presidente Marcos nga agtitipon ti pwersa ti national ken local government tapno siguradwen a makadanun a dagus ti tulong kadagiti agkasapulan iti daytoy.
Kabayatanna, nagballaag ti presidente kontra iti ‘hoarding ken profiteering’ tapno manipularen ti presyo dagiti kangrunaan a magatgatang, kagiddan ti panagballaag na a daytoy ket mailabsing iti linteg.
Iti baet ti sitwasyon, agtalek ni Presidente Marcos a malabanan ti pagilian ti sangsangwen a pannubok gapu iti kinatibker dagiti Pilipino.
