LAOAG CITY – Ipawil ni Presidente Ferdinand Marcos Jr. dagiti nayon a singir ken dagiti kontribusion kadagiti pampubliko a pagadalan, nangruna iti panawen ti graduation dagiti estudiante.
Segun ken ni Marcos, paset daytoy dagiti wagas tapno saan a manayunan ti padagsen kadagiti nagannak aglalo ita a panawen a nakaro ti epekto ti agtultuloy a panagngato ti presyo dagiti produkto a petrolyo kadagiti umili.
Kuna pay ti presidente a masapul a matutukan ti kasasaad dagiti agtutubo babaen iti saanen a panangnayon ti bayadan dagiti estudiante.
Kagiddan iti daytoy, inwaragawag ti Presidente ti panangrugi ti Serbisyo Fair ti Department of Education no sadinno a dagiti ahensia ti gobierno ken dagiti employer ti mapan kadagiti pagadalan tapno maka-apply iti trabaho dagiti senior high student nga agturpos ita nga school year.
