LAOAG CITY – Kalikagom ti gobierno ni Presidente Ferdinand Marcos Jr. a makissayan ti discretionary powers wenno nalawa a bileg nga agdesisyon dagiti opisyal ti gobierno ken us-usaren ti digitalization tapno ad-adda a maprotehiran ti pondo ti umili kontra iti korapsyon ken panagsayang.
Inbatad ni Presidente Marcos Jr. nga adda dagiti mekanismo para iti panagbantay ti pondo ngem maipagarop a saan a kanayun a maipatpatungpal a nasayaat.
Segun iti Presidente, naikabilen iti nababbaba a lebel ti burukrasya ti sumagmamano a dadakkel a desisyon iti panaggastos, karaman dagiti desisyon nga agbalor ti binilyon a piso.
Gapu iti daytoy, kuna na a kasapulan makissayan ti discretionary powers gapu ta mabalin a mangipaay ti gundaway para iti korapsyon.
Ibilang met ni Presidente Marcos Jr. ti digitalization kas napateg a wagas tapno makissayan ti human intervention kadagiti proseso ti gobyerno ken maipababa ti posibilidad ti korapsyon ken panagsayang ti pondo.
Inkari ti presidente nga agtultuloy nga urnusen ti administrasyon na dagiti proseso tapno masigurado a saan a maabuso ti bileg iti panagdesisyon, natalged ken patas a pannakausar ti pondo ti publiko.
