LAOAG CITY – Nagpanawagan ni Presidente Ferdinand “Bongbong” Marcos Jr. kadagiti pilipino nga arakupen ti namnama, panagkaykaysa ken panangisakit kabayatan ti panagselebrar ti pagilian ti Easter Sunday, a mangisim-simbolo iti pannakabiag manen ni Hesukristo ken panagleppas ti Semana Santa.
Iti mensahe na, inbatad ni Presidente Marcos a makikaykaysa iti sibubukel a pilipino iti panangselebrar ti paskua ti pannakabiag, naballigi a kangitingitan ti nasantuan a lawas ken nadiosan a panangiwaragawag iti panagungar ni Kristo.
Selebraran dagiti kristiyano a pilipino ita nga aldaw nga addaan ti nauneg a debosyon ken kinaragsak iti intero a pagilian kas pananglagip iti panagbiag manen ni Hesukristo kalpasan ti maysa a lawas a meditation ken dedikasyon.
Inpetteng ti presidente a ti okasyon ket mangisimsimbolo ti balligi kontra iti kinaawan ti namnama ken napabaro a pigsa iti babaen ti pammati.
Ginutigot na pay dagiti umili nga agbiag kadagitoy a panangipaay ti importansya iti babaen ti panagbalin a nasayaat ken agmaymaysa ti pagsungsungbatan tapno makabukel ti nataltalged ken agkaykaysa a pagilian.
Malaksid iti daytoy, ginutigot pay ti presidente dagiti pilipino nga agtitinnylong iti panangbukel ti maysa a pagilian no sadinno a pagpannurayen ti kinasayaat ken panagkaykaysa ti agserserbi a pigsa iti tunggal maysa.
Innayon na nga iti babaen ti naan-anay a pammati, panangipateg ti nakaiyanakan ken maymaysa a gagem, awan ti pannubok a saan a malabanan.
Inpettengna ni Marcos a gagem a maiwanwan ti “Bagong Pilipinas” no sadinno a ti panangisakit ken panangtaripato iti pada a tao ti agtultuloy a mangiladawan iti kinatao ti tunggal Pilipino.
Segun pay iti presidente, iti panaglabas dagiti henerasyon, ipalpalagip ti paskua ti pannakabiag a ti sakripisyo ket saan a masayang ken ti panagrigrigat ket rugi iti baro a namnama.
Kamaudianan na, nagpanawagan ti presidente iti kada Pilipino a bumangon nga adda ti baro a gagem, natalged a namnama ken nauneg a pagsungsungbatan iti tunggal maysa ken pabiagen ti anak ti paskua ti pannakabiag iti babaen ti pannangisakit, panagtitinnulong ken panagkaykaysa.
