LAOAG CITY – Nakasagana ni Presidente Ferdinand Marcos Jr. a dumalan iti imbestigasion mainaig iti report ti Philippine Center for Investigative Journalism (PCIJ) a mangibagbaga a maipagarup a nakaawat isuna ti P21 million manipud iti Rudhil Construction and Enterprises para iti kampaniana idi 2022.
Inbatad ni Palace Press Officer Claire Castro a saan nga aglemlemmeng ti Presidente ken sitatallugod daytoy a dumalan iti aniaman a proseso iti panangtingiting no sakupen ti imbestigasion ti naganna.
Inpetteng ni Castro a natured ti Presidente ken kumpiansa daytoy a madalusan ti naganna iti babaen ti pormal a proseso ti imbestigasion.
Kunana a nalawag ti takder ti Presidente nga awan ti asinoman uray isuna ti nasken a maiyadayo iti linteg wenno iti aniaman a panagdengngeg mainaig iti maanomalya.
Iti baet ti kontrobersia, binigbig ti Malacañang a sensitibo ti alegasion gapu ta pakairamramanan dagitoy dagiti kontratista nga addaan ti proyekto iti gobierno.
