LAOAG CITY – Inbatad ni Presidente Ferdinand Marcos Jr. a ti pannakaurnus ti presyo dagiti produkto a pang-agrikultura ti immuna nga inbilin na ken ni nadutukan a Department of Agriculture Secretary Francisco Tiu Laurel.
Inrakurak daytoy ni Presidente Marcos kalpasan iti opisyal a panangdutuk na ken ni Laurel Jr. iti nasao a pwesto.
Segun iti presidente,masapol nga urnusen ni Laurel ti presyo dagiti kangrunaan a produkto iti agrikultura tapno saan a marigatan dagiti umili kangrunaan na iti nangato a presyo ti bagas, asukar, sibuyas ken dadduma pay.
Karaman pay a patututukan ni Presidente Marcos ket ti epekto ti climate change iti agrikultura ken African swine fever.
Inmandar pay ti presidente ken ni Laurel a mangidatag a dagus kadagiti agpaot a plano na iti agrikultura tapno matungpal ti gagem ti gobierno nga adda ti umdas a suplay a taraon ken nangato a produksyon.
Innayon na a napateg pay a kitaen ti baro a sekretaryo ti Department of Agriculture dagiti teknolohiya nga us-usaren ti Thailand, Indonesia ken Vietnam iti agrikultura tapno makaala ti ideya kadagitoy para iti pannakapasayaat iti sektor ti agrikultura.
Maipalagip nga inadmitir ni Presidente Marcos a maysa kadagiti kangrunaan a problema ti gobierno ket ti nangato a presyo ti bagas gapu iti manipulasyon dagiti smuggler ken hoarders isut gapuna nga inbilin na ti agtultuloy a a pannakaparmek dagitoy.
