LAOAG CITY – Saan a makibiang ni Presidente Ferdinand Marcos Jr. iti maiwaywayat nga imbestigasion mainaig iti maanomalya a flood control projects.
Inbatad ni Palace Press Officer USec. Atty. Claire Castro nga addan ti Independent Commission for Infrastructure (ICI) a binukel ti Presidente nga isu ti nakatutok tapno imbestigaran ti nasao a banag.
Inaramid ti Palace official ti rakurak idi nasaludsod mainaig iti pannakairaman ti nagan ti kasinsin ti Presidente a ni dati nga House Speaker Martin Romualdez iti panagdengngeg ti Senate Blue Ribbon Committee no sadinno a nadakamat iti testimonia ti dati a security aide ni Ako Bicol Party List Representative Elizaldy Co a ni Orly Guteza a maipagarup a mangitultulod kadagiti maleta a naglaon ti minilyon a gatad ti cash iti pagtaengan ti dati nga House Speaker.
Naminsan manen nga inpetteng ni USec. Castro a kalikagum ti Presidente a nasken nga adda ti maidatag nga ebidensia kadagiti amin nga agbalin a testigo iti maipagarup nga anomalya kadagiti nasao a proyekto tapno mausar iti Korte no bilang adda ti mapilaan ti kaso.
Kwinestionaran pay ti opisial ti panagbalin a lehitimo ti affidavit ni Guteza kalpasan a rimmuar iti report a peke ti nasao nga affidavit kalpasan a naglikudan ti abugado a nakapirma iti panag-notaryo iti nasao nga affidavit ni Guteza.
Saan met a makita ti Malacañang a dumanon iti gundaway a mairaman ti nagan ti Presidente kagiddan ti pannakairaman ti nagan ti kasinsinna a ni Romualdez iti imbestigasion ti Senado iti maipagarup nga anomalya iti flood control.
Immuna iti daytoy, inrakurak ni Presidente Marcos nga awan ti kanununganna iti imbestigasion kadagiti posible nga anomalya iti flood control projects.
