LAOAG CITY – Awan ti asinoman nga opisial, uray pay ni Presidente Ferdinand Marcos Jr., ti makalasat iti probision ti 2026 General Appropriations Act (GAA) a mangipawil iti panangikabil ti nagan ti pulitiko iti panangipaay ti tulong ti gobierno.
Inbatad ni Palace Press Officer Claire Castro, insigida nga ipapaikkat ni Presidente Marcos iti Department of Social Welfare and Development (DSWD) ti tarpaulin-na iti maysa a payout center para iti ayuda dagiti driver.
Naiget a nabalakadan dagiti lokal nga opisial a saan nga aramiden nga entablado ti panangpulitika ti panagibunong ti ayuda.
Ti tulong ti gobierno ket para iti publiko, saan a para iti pangpabanglo ti nagan.
Iti baet daytoy, kuna ti Malacañang a napateg latta a maipakaammo kadagiti umili dagiti programa ti administrasion kas pammaneknek nga adda ti ar-aramiden ti gobierno iti baet ti krisis.
