LAOAG CITY – Saan a kayat ni President Ferdinand Marcos Jr. ti extradition tapno mapagsubli ni dati a Rep. Zaldy Co manipod idiay Portugal.
Daytoy ti nagbalin a sungbat ti Malakanyang iti nagbalin a rakurak ni Mamamayang Liberal (ML) party-list Rep. Leila De Lima a masapol nga isubli ni Co iti Pilipinas babaen ti deportasyos imbes nga extradition, gapu ta makabannog ti proseso daytoy.
Iti press briefing, inbatad ni Palace Press Officer Claire Castro a ti paggaammo na ket inbilin ni Presidente Marcos nga aramiden amin a legal remedy tapno mapaalisto ti panagawid ken pannakaisubli ni Co ditoy pagilian.
Nupay kasta, kuna ni Castro a saan a babaen ti extradition no di ket naan-anay a pannakisarita iti Portugal, ken ti panangusar ken pannaki-kooperar iti Interpol wenno International Criminal Police Organization.
Immuna iti daytoy, inrakurak ni Department of the Interior and Local Government Secretary Jonvic Remulla nga adda ti pammilin ni Presidente Marcos kadakuada a pormal nga agaplikar ti extradition treaty uray awan pay ti pormal nga extradition treaties iti nagbaetan ti dua a pagilian.
Ni Co a nagserbi kas House Appropriations Committee chairperson ket sumangsango ti graft, malversation ken falsification of public documents gapu iti maanomalya a flood control project idiay Oriental Mindoro.
Pimmanaw ni Co ditoy pagilian idi katengngaan ti 2025 para iti panagpaagas na iti ballasiw taaw.
Nagresign ni Co kas miembro iti kamara de representantes sakbay a makanselar ti travel authority na.
Maipalagip a kinanselar ti Pilipinas ti pasaporte ni Co ngem basar kadagiti otoridad, mabalin a ti us-usaren ti dati a kongresista iti panagbiyahe na ket ti Portuguese passport na.
