LAOAG CITY – Suportaran ni Presidente Ferdinand Marcos Jr. ti siasinno man nga opisyal a pilien ti senado tapno agserbi kas presiding officer iti impeachment trial ni Vice President Sara Duterte.
Sungbat daytoy ti presidente iti saludsud kenkuana no suportaran na ni Senador Chiz Escudero no daytoy ti mapili kas presiding judge iti Senate impeachment court.
Segun iti Presidente, respetaren na ti bileg ken otonomiya ti senado iti panagpili ti mangidaulo iti impeachment proceedings.
Inpetteng na nga awan ti aniaman a panangkontra na iti agbalin a desisyon dagiti senador basta maiyallubog iti linteg, sumurot iti naikeddeng a proseso ken maibasar kadagiti probisyon ti Konstitusyon.
Inpaganetget ni Presidente Marcos, napateg a mapagtalinaed ti integridad ken kredibilidad ti proseso tapno masigurado ti panagtalek ti publiko kadagiti institusyon ti gobierno.
Kagiddan iti daytoy, inrakurak ti presidente a naan-anay a nakasagana a makitinnulong iti senado tapno mapagtalinaed ti naurnus a relasyon ti ehekutibo ken lehislatibo.
Mangnamnama ni Presidente Marcos a dagiti panagbalbaliw nga insayangkat iti organisasyon ken liderato iti senado ket makatulong tapno maisubli ti kinaunus, mapaalisto ti panangtratar kadagiti napapateg a nailungalong a linteg ken ad-adda a mapasayaat ti pannagna ti institusyon para iti pagsayaatan ti publiko.
