LAOAG CITY – Inpetteng ni PBGen Nicolas Torre III, Regional Director ti Police Regional Office 11, nga awan ti maris politika na ti panangiserbi da ti warrant of arrest iti pugante a pastor a ni Apollo Quiboloy ken uppat a kadwa na nga akusado.
Daytoy ket kalpasan ti pananglapped dagiti supporters ni Quiboloy iti search operations da.
Segun ken ni Torre, no mamati dagiti miembro ti Kingdom of Jesus Christ nga inosente ti pastor ket makitinnulong laengen dagitoy iti pulisya imbes nga iyik-ikkis da ti hustisya iti kalsada.
Inpetteng ni Torre a dagiti search operations da ket pabor amin iti “terms” dagiti miembro ti Kingdom of Jesus Christ isut gapuna a saan da a masawar a naimbag ti compound.
Inpakaammo pay ni Torre nga adda ti maysa a building a sinerrek da a basar iti impormante da ket adda ti kwarto ni Quiboloy iti uneg a mabalin na a paglemmengan.
Innayon na a nakumpirmaran da nga adda ti kwarto iti uneg ken adda dagiti nakita a kawes ken sapatos ti lalaki nga usto laeng iti sukat ni Quiboloy ngem awanen ti naabutan da gapu ta bakanten ken nadalos ti kwarto.
