LAOAG CITY – Inpakaammo ni Coast Guard Lieutenant Joseph Christian Sagun, Provincial Director ti Philippine Coast Guard – Ilocos Norte nga awan pay ti naawatda nga impormasion mainaig iti maipagarup a plano ti China a mangipatayab ti hypersonic missile iti 25 a lugar ditoy pagilian pakairamanan ditoy Ilocos Norte.
Daytoy ket kalpasan a nangiparuk-at ti statement ni Sen. Imee Marcos babaen iti online account-na maipanggep iti nasao a banag.
Nupay kasta, inbatad ni Sagun nga agtultuloy ti panagmonitor ken panagpatrolya dagiti kameng ti Philippine Coast Guard – Ilocos Norte manipud iti ili ti Burgos agingga iti ili ti Pagudpud.
Kunana nga adda ti 60 a kameng ti Philippine Coast Guard – Ilocos Norte ti manarimaan nga agpatpatrolya kadagiti nadakamat a lugar.
Inlawlawagna nga awan met pay dagiti maaw-awatda a saan a napintas a report agpapan iti daytoy a gundaway.
Mainaig iti daytoy, inpalgak ni Coast Guard Lieutenant Sagun a ti Philippine Coast Guard – Region 1 ti rumbeng a mangipaay ti komento maipapan iti nasao a banag.
Innayonna no ingkaso nga adda ti kastoy a plano ti China ket ti Regional Office ti Philippine Coast Guard ti mangibilin ti desision no ania dagiti plano nga addang nga aramiden ti Philippine Coast Guard – Ilocos Norte.
