LAOAG CITY – Binilin a dagus ni Gob. Matthew Marcos Manotoc ni Police Col. Frederick Obar, Provincial Director ti Ilocos Norte Police Provincial Office a makikoordinar ti baro a Provincial Director iti Philippine Coast Guard ti Ilocos Norte a ni Coast Guard Lt. Joseph Christian Sagun.
Daytoy ket kalpasan dagiti nagbalin a pakaammona iti naisayangkat a 2nd Quarter Joint Provincial Peace and Order Council wenno PPOC ken ti Provincial Anti Drug Abuse Council wenno PADAC meeting.
Mainaig daytoy iti pananangipetpetteng ti China a paset ti teritorioda ti West Philippine Sea wenno WPS ken ti planoda a panagpatayab ti rocket manipod Hunio 28 agingga Hunio 30.
Inlawlawag ni Sagun a mangisaysayangkat dagitoy ti “information drive” kadagiti coastal barangay ti Ilocos Norte manipud iti ili ti Pagudpud agingga iti ili ti Badoc.
Inpalgakna a basar iti naipadanon kadakuada nga impormasion, adda ti paglintegan a naiyetnag kangrunaanna iti Chinese Coastguard Number 3 a nakaipalaonan ti panangipetpetteng ti China a teritorio dagitoy agingga iti 54 nautical miles ti West Philippine Sea.
Kunana a nagpanawaganda kadagiti mangngalap a no adda ti mangbutbuteng kadakuada iti baybay ket ipakaammoda a dagus kadakuada.
Nupay kasta, inbatadna nga awan pay ti aniaman a maiyasping nga insidente a naipadanon kadakuada.
Mamati ni Sagun a natalged dagiti mangngalap ditoy probinsia agsipud ta agingga laeng iti uppat a pulo a kilometro manipud iti igid ti baybay ti pakadandanonanda iti panagkalapda.
Kabayatanna, inpakaammona nga adda ti inpatulod ti China Coast Guard iti Philippine Coastguard a pakaammo babaen iti e-mail a nangipabanto dagitoy ti rocket idi Biernes, Hunio 28.
Segun kenkuana, adda ti posibilidad nga adda matennag a debris iti paset iti ili ti Burgos.
Mainaig iti daytoy, inpakaammona nga umapelada kadagiti mangngalap a no adda ti makita dagitoy a matennag a “debris” wenno paset ti rocket ket ipakaammoda a dagus kadakuada.
Innayonna a nangiyuswat ti panagpabanto ti China ti rocket idi kalman iti alas singko ti malem agingga iti alas onse ti rabii.
