Nagballaag ti Philippine Coast Guard – Ilocos Norte kadagiti mangngalap iti ili ti Burgos a saan nga alaen ken asitgan no adda ti makita a debris ti Long March 7A Rocket ti China.
Segun ken ni Coast Guard Lt. Joseph Christian Sagun, Provincial Director ti Philippine Coast Guard – Ilocos Norte, daytoy ket kalpasan a maibilang a napeggad gapu iti epekto ti radiation ti rocket ken makasabidong a substance kas ti rocket fuel.
Inbatadna nga agarup alas otso ti rabii idi kalman ket nakita dagiti kameng ti Philippine Coast Guard Substation iti ili ti Burgos ti panagpabanto ti China ti rocket a mapattapatta nga adda ti 70 a kilometro ti kaadayona manipud iti nakaitennaganna.
Inlawlawagna nga iti kabigatanna ket dagusda a nangiyuswat ti information drive kadagiti coastal areas ti nasao a lugar tapno mapakaammoan dagiti mangngalap maipanggep iti daytoy.
Kunana a naiget ti panagpatrolya ti Philippine Coast Guard iti kabaybayan tapno makita dagiti debris a natinnag manipud iti panangipabanto ti China ti rocket.
Innayonna a natalged dagiti mangngalap ditoy probinsia agsipud ta agingga laeng iti uppat a pulo a kilometro manipud iti igid ti baybay ti pakadandanonanda iti panagkalapda.
Kabayatanna, inpakaammo ni Coast Guard Lt. Sagun nga awan ti maaw-awatda a report maipapan iti harassment dagiti Chinese kadagiti mangngalap ditoy probinsia.
Maipalagip a binilin a dagus ni Gob. Matthew Marcos Manotoc ni Police Col. Frederick Obar, Provincial Director ti Ilocos Norte Police Provincial Office a makikoordinar iti Provincial Director iti Philippine Coast Guard ti Ilocos Norte a ni Coast Guard Lt. Sagun.
Immuna iti daytoy, nagballaag ti National Disaster Risk Reduction and Management Council (NDRRMC) iti posible a panagsuek dagiti debris manipud iti panangirubuat ti rocket ti China a Long March 7A iti kabaybayan nga asideg ditoy Ilocos Norte ken idiay Cagayan.
