LAOAG CITY – Agtultuloy ti iwaywayat ti Philippine Coast Guard (PCG) a monitoring ken panagpatrolya gapu iti iligal a kaadda ken panaglayag ti Chinese Coast Guard Vessel 5901 iti Exclusive Economic Zone (EEZ) ti Pilipinas iti kaadayo nga 60-70 nautical miles manipud iti kabaybayan ti Zambales.
Iti statement ni PCG Spokesperson for the West Philippine Sea Commodore Jay Tarriela, kinunana a ti 83-meter-French built PCG vessel-da a BRP Gabriela Silang ket nangi-isyu manen ti ballaag iti Chinese Coast Guard vessel 5901 a mangipalagip kadakuada nga illegal ti ar-aramidenda ken saan a maipalubos.
Nalawag iti mensahe nga inbati ti Philippine Coast Guard nga ‘unlawful’ ti panaglayagda iti Exclusive Economic Zone ti pagilian.
Inyunay-unayna pay ni Tarriela iti radio broadcast-da ti maipanpan iti United Nations Convention on the Law of the Sea (UNCLOS).
Kinunana nga iti babaen daytoy, nailawlawag ti ‘freedom of navigation for foreign-flagged vessels’ ket saan a rumbeng a makastrek iti uneg ti Exclusive Economic Zone ti maysa a pagilian a pakairamanan ti Pilipinas.
Kabayatanna, impanamnama ni Tarriela nga agtultuloy ti panagkumitda a mangmonitor ken saan a palubosan dagiti illegal nga aktibidad ti Chinese Coast Guard iti West Philippine Sea.
