LAOAG CITY – Nangipasa ti report iti National Bureau of Investigation (NBI) ni Palace Press Officer ken Presidential Communications Office (PCO) Undersecretary Atty. Claire Castro mainaig iti maipagarup a death threat a naawatna kalpasan ti nagbalin a “Chucky doll remark” daytoy kontra ken ni Vice President Sara Duterte.
Inbatad ni Castro a naggapu iti pangta iti maysa a Facebook page a “Luminous by Trixie Cruz-Angeles & Ahmed Paglinawan,” a maikonkonektar iti dati a Press Secretary a ni Atty. Trixie Cruz-Angeles.
Kunana a nalawag a naglaon ti pangta iti biagna ti nasao a post isut gapuna nga in-report-na daytoy nga insigida kadagiti otoridad no bilang adda ti dakes a mapasamak kenkuana.
Inadmitir ni Castro a nakarikna daytoy ti buteng aglako ket saan daytoy a sanay kadagiti kastoy a klase ti panagpangta.
Ad-adalen ti opisal ti posibilidad a panangipila ti maiyannatop a kaso kontra kadagiti adda iti likudan ti nasao a rakurak.
