LAOAG CITY – Pormalen a nagtugaw kas acting Provincial Director ti Ilocos Norte Police Provincial Office ni PCol. Frederick Eslava Obar.
Naiwayat ti turn-over ceremony ti acting Provincial Director ken out-going Provincial Director a ni PCol. Julius Suriben idi kalman Enero 29, 2024.
Nammuan a ni Obar ket aggapo iti anti-kidnapping group ken maysa a miembro ti Special Action Force (SAF), ken nagbalin na met laeng a batch ni Suriben idi tawen 1998 iti Philippine Police Academy.
Nammuan a ni PCol. Suriben ket maidestino iti Region 4-A kas agbalin regional chief staff.
Gapu iti daytoy ket naragsak ni Obar a nangawat ti obligasyon na pakairamanan dagiti pammadayaw ti Ilocos Norte Police Provincial Office iti babaen ti panngidaulo ni PCol. Suriben.
Imbatad ni Obar a mas paigetan na pay ti kampanya kontra ilegal a droga, bayat nga itultuloyna dagiti aktibidad a narugyanen ti administrasyon ni Suriben.
Kabayatanna, inkari na nga aniaman ti sumangbay a problema ditoy probinsya ket ikagumaan na a marisot tapno agtultuloy ti urnos, linak ken talna ditoy probinsya.
