LAOAG CITY – Nakasagana ti Philippine Charity Sweepstakes Office nga usaren ti sabong tapno maisubli ti napukaw a kita ti gobierno gapu iti naipatungpal a total ban kadagiti Philippine Offshore Gaming Operators wenno POGO.
Iti budget briefing ti Philippine Charity Sweepstakes Office iti Kamara, kinarit ni Deputy Speaker David Suarez ti Philippine Charity Sweepstakes Office a mangsapul iti “innovative” wenno moderno a wagas tapno mapasubli ti revenue loss a patta-pattaen ti Bureau of Internal Revenue a dumanon iti sangapulo a bilion a pisos.
Malaksid iti daytoy, duapulo ket lima a ribu a mangmangged a Pilipino ti naipdamag a napukawan ti trabaho gapu iti pannakaserra ti Philippine Offshore Gaming Operators.
Kinuna ni Suarez a gapu ta nasaknap pay laeng ti online gambling wenno e-sabong ken saan a maipasardeng ket mabalin nga idalan iti “proper policies”, safety nets ken at ken linteg ti operasion to remote cockfighting wenno sabong.
Insungbat ni Philippine Charity Sweepstakes Office Chairman Felix Reyes, a no maibilin kadakuada nga aramidenda daytoy ket posible a makaurnong ti gobierno iti pamastrekan babaen ti charity cockfighting.
Dinakamat ni Reyes ti Presidential Decree 449 wenno ti Cockfighting Law of 1974 no sadinno nga adda probision a mangibagbaga ti cockfighting para iti charity purposes ket mabalin nga itungpal iti local scope.
Innayon ti Philippine Charity Sweepstakes Office a basar iti datos, adda 789 nga aktibo nga illegal e-cockpit operators ditoy pagilian.
