LAOAG CITY – Nagpanawagan ti Person’s with Disability Affairs Office ditoy ciudad ti Laoag a saan a rumbeng nga abuswen ti panagusar ti priority lane.
Inaramid daytoy ni Mr. Christopher King Medina, Disability Officer 4 ti Person’s with Disability Affairs Office kalpasan a naobserbaran na nga adda dagiti person with disability, senior citizen ken masikog nga agpila iti priority lane ngem ado unay ti ipila da gapu ta ilako da metten iti sari-sari store wenno dagiti pagbunongda kadagiti tattao.
Inbatad na a saan koma a rumbeng a kastoy ti aramiden da gapo ta ti rebbeng laeng a maipila iti priority lane ket ti personal a kasapulan da tapno saan a maibayag unay dagiti sumarsaruno kadakuada.
Inpetteng ni Medina a no agtultuloy ti kastoy a mapasamak ket kaasi dagiti dadduma a kameng ti vulnerable sector aglalo kadagiti mabilbilang laeng nga items ti gatangen na.
Kiniddaw na ti naan-anay a pannakaawat ti tunggal maysa aglalo ita a Christmas season nga ado dagiti agturong kadagiti nagduduma a pagtagilakoan.
Malaksid iti daytoy, inbatad pay ni Medina nga adda dagiti establisimiento a pudno nga adda dagiti naestablisar a priority lanes ngem awan met ti staff da a mangakomodar kadagiti kameng ti vulnerable sector.
Innayon na a kanayun ti panangpalagip da kadagiti establisimiento a makita da a kastoy ti sitwasyon tapno mapapintas ti serbisyo da aglalo ita a paskua nga ado dagiti mapan aggatang.
