LAOAG CITY – Inbutaktak ti Philippine Drug Enforcement Agency (PDEA) ti nauneg a kuneksiyon ti Philippine Offshore Gaming Operator (POGO) ken dagiti drug syndicates iti panagdengngeg ti Quad Committee.
Inpresentar iti Quad Committee ni Philippine Drug Enforcement Agency (PDEA) Deputy Director General Renato Gumban ti matrix a mangipakpakita no kasanu a maisaysayangkat dagiti transnational syndicates ti drug trafficking, money laundering ken ti kwestiyunable a panaggatang dagiti daga dagiti banuar ditoy Pilipinas.
Nangrugi ti imbestigasyon iti naiyuswat a joint operations idi Setyembre 24, 2023 no sadinno nga adda ti 560 a kilo ti maipagarop a shabu ti nakumpiskar iti Mexico, Pampangan nga agbalor ti P3.6 Billion.
Nakumpiskar dagiti nasao nga iligal a droga iti warehouse a kukua ti agnagan Willie Ong a mabigbig pay kas Cai Qimeng a maysa metlaeng nga incorporator ti Empire 999 Realty Inc., a maysa a dakkel a kompanya a karaman iti illicit activities.
Karaman pay ti Golden Sun 999 Realty Inc. and Development Corporation ken ti Yatai Industrial Park nga agpada nga adda ti pakainaigan da Ong ken Aedy Yang.
Ti Golden Sun 999 ket adda ti koneksyon na ken ni Rose Nono Lin a karaman iti kontrobersiyal a Pharmally Pharmaceutical Corporation.
Iti presentasyon ti Philippine Drug Enforcement Agency ket naestablisar ti direkta a koneksyon iti nagbaetan ti Philippine Offshore Gaming Operator ken ti criminal syndicates.
Kabayatanna, inbatad ni Rep. Gerville Luistro a makaalarma dagiti nasao a rebelasyon.
