LAOAG CITY – Nagballaag iti publiko ni Agent Mariepe de Guzman, Regional Public Information Officer iti Philippine Drug Enforcement Agency – Region I kontra iti panagusar ti “tuklaw cigarette”.
Naamoan a ti “tuklaw” a sigarilyo ket naimula kadagiti kabanbantayan iti Northern Vietnam, ken mailaklako dagitoy babaen iti online.
Kuna ni de Guzman a ti tobacco plants a maar-aramid para iti Tuklaw a sigarilyo ket maysa a variety ti tabako nga us-usaren dagiti katutubo ti Vietnam kadagiti rituwal no sadinno nga agaramid da ti bamboo pipe nga isu ti pangikabilan da ti tabako ken ditoy ti pangsusuponda.
Segun ken ni de Guzman, addan dagiti namonitor nga agus-usar ti Tuklaw cigarette wenno “Thuoc Lao” iti Metro Manila, Puerto Princesa ken dadduma pay a paset ti pagilian.
Nupay kasta, inpasingked ni de Guzman nga awan pay ti namonitor da iti rehiyon Uno nga agus-usar ti “tuklaw” a sigarilyo.
Inlawlawag ni de Guzman a basar iti panagmonitor dagiti otoridad ket alisto a sumamay ti epekto ti nasao a sigarilyo no sadinno nga iti uneg laeng ti lima a minuto kalpasan a simmusop ti maysa a tao ket makitan dagiti sintomas a pasaren na kas ti panagtagtagerger, panagam-amangaw ken mabalin pay nga ipatay daytoy.
Inrakurak ti opisyal a malaksid iti nangato a content ti nikotina iti Tuklaw cigarettes ket naduktalan pay basar iti panangeksamen dagiti otoridad kadagiti nakumpiskar a sample nga adda ti laok na a synthetic cannabinoid wenno marijuana isut gapuna a maibilang daytoy a makaalarma.
Maipalagip nga adda dagiti nagwaras a video dagiti agtutubo iti online a dagitoy ket nagusar ti “tuklaw cigarettes” ken ado dagiti naalarma gapu ta makita ken maobserbaran saan nga ammo dagiti maseknan ti ar-aramiden da wenno arigna awanen ti limpiyo iti panagpanpanunot da.
