LAOAG CITY – Inaprobaran dagiti kameng ti Provincial Disaster Risk Reduction and Management Council ti listaan dagiti proyekto nga inaprobaran ni Gob. Matthew Marcos Manotoc a pakausaran ti lima punto siyam a milyon a pisos a nayun a pundo ti junta probinsyal.
Segun ken ni Mr. Marcell Tabije, Local Disaster Risk Reduction and Management Officer ti gobierno probinsial, karaman ditoy ti crop rescue project ti Provincial Agriculture Office a nailatangan ti 650 ribu a pisos a pondo.
Inpakaaamo pay ni Tabije a gapu ta adu ti kaso ti rabies ditoy probinsia iti napalabas a tawen ket adda ti nailatang a pundo a maigatang ti anti rabies vaccine para kadagiti taraken nga aso, pusa ken dadduma pay nga usaren ti Provincial Veterinary Office para iti agtultuloy a panagbakunada kadagiti taraken.
Malaksid iti daytoy, adda met ti pundo a nailatang a maigatang iti “dengue test kits” ti Provincial Health Office gapu ta napinpintas no nasapsapa a maduktalan dagiti naapektaran ti dengue tapno dagus a mataming dagiti maseknan.
Inlawlawagna nga adda pay ti emergency financial/shelter assistance a para kadagiti biktima ti didigra kangrunaanna kadagiti nadadaelan ti balay; maigatang iti “construction materials” para kadagiti mauraman ti pagtaengan ken tulong pinansial tapno al-alisto a matarimaan dagiti nadadael a balay.
Kunana nga adda pay ti nailatang a nayun a pundo para iti pannakaiyestablisar dagiti Small Farm Reservoir ken dadduma pay a proyekto ti Sustainable Development Center nga agserbi nga “harvesting facility” iti panawen ti panagtudtudo ken usaren dagiti mannalon iti panawen ti tikag.
Imbatad ni Tabije nga adda pay ti para iti nayun a food pack a mausar iti relief operations ken para kadagiti responders iti kanito a ma-activate ti emergency operation center ti probinsia.
Innayonna a kalpasan nga inaprobaran ti Provincial Disaster Risk Reduction and Management Council ket maipresentar iti Sang. Panlalawigan ken no maaprobaran ket maisaruno ti pannakaipagna dagiti papeles para iti pannakaipatungpal dagiti nasao a proyekto.
