LAOAG CITY – Kalikagom ti Provincial Disaster Risk Reduction and Management Council a gumatang pay ti ad-ado a kagamitan a maaramat no adda ti gingined ken dadduma pay a klase ti kalamidad.
Daytoy ti inbatad ni Mr. Marcell Tabije, mangidadaulo ti nasao a pangopisinaan kalpasan ti nagbalin a resulta ti naisayangkat nga earthquake ken fire drill iti gobierno probinsial.
Kunana a manamnama a sumangpet dagiti equipment a battery-operated tapno saanen a marigatan ken maibayag ti panagresponde no adda ti gingined.
Mainaig iti daytoy, gagem ti gobierno probinsial a maiprioridad ti pannakagatang kadagiti equipment.
Kabayatanna, kuna ni Tabije a tunggal opisina ket adda iti trained personnel tapno saanen a mauray dagiti aggapo iti ruar nga agresponde kadakuada.
Ummuna iti daytoy, maragsakan ni Tabije iti kooperasyon ti kakailian iti daytoy nga aktibidad kas panagsagsagana iti gingined gapo iti nagsasaruno a nairekord a gingined ditoy pagilyan.
Inbatad na a ti earthquake drill ket simultaneous exercise kas panangsurot iti bilin ni Gov. Cecilia Araneta-Marcos.
Mainaig iti daytoy, nagyaman pay ni Tabije kadagiti medical team ken dadduma nga ahensia a nakipagpaset iti aktibidad kangrunaan ti medical team manipod Gov. Roque Ablan Sr. Memorial Hospital ken Bureau of Fire Protection, ken dagiti nagduduma a departmento ti gobierno probinsial.
Kabayatanna, inbatad met ni Fire Supt. Roxanne Parado a no i-rate na ti execution ti earthquake ken fire drill ket 8 out of 10 daytoy.
Segun kenkuana, dakkel a tulong ti naiyuswat a drill nangruna ket saan a mapakpakadaan ti gingined.
Maipalagip nga inbilin ni Gov. Cecilia Araneta-Marcos ti simultaneous drill gapo ta idi napalabas a gingined a dimmayeg iti probinsia ket naobserbaran na a saan nasurot ti duck, cover, and hold.
