LAOAG CITY – Manarimaan ti pannakikoordinar ti Provincial Disaster Risk Reduction and Management Council kadagiti lokal a gobierno ditoy probinsya kas panagsagsagana no adda ti mapasaran a napigsa a gingined ditoy probinsya.
Segun ken ni Mr. Marcel Tabije, ti mangidadaulo iti Provincial Disaster Risk Reduction and Management Council ditoy probinsya, kidkiddawen da kadagiti Local Government Unit a mangiwayat ti audit kadagiti imprastraktura iti masakupan da a lugar tapno maamoan no adda dagiti kasapulan a maireinforce wenno ma-retrofit.
Inbatad na a napateg a maamoan a nasapsapa dagitoy a banag gapu ta saan a mapakpakadaan ti gingined.
Innayon na a saan a maipasigurado ti kinatalged wenno structural integrity dagiti pasdek aglalo kadagiti kadaanan.
Kabayatanna, kuna ni Tabije a dakkel a tulong dagiti maisaysayangkat nga earthquake drill kadagiti pagadalan, pagtrabahoan ken dadduma pay gapu ta ditoy a maiyadal iti publiko no ania dagiti rumbeng nga aramiden sakbay, kabayatan ken kalpasan ti panagpasar ti gingined.
Mainaig iti daytoy, inpasigurado ni Tabije a nakasagana ti probinsya no adda ti mapasaran ti napigsa a gingined manipod kadagiti tulong a maipaay, mausar nga equipment ken dagiti kanayun a nakaalerto a responders a nakasagana a tumulong kadagiti umili.
Maipalagip a nagsasaruno dagiti napipigsa a gingined a timmama iti pagilian iti kallabes, partikular iti Cebu, La Union ken iti ciudad ti Baguio.
