LAOAG CITY – Inaprobaran dagiti kameng ti Provincial Disaster Risk Reduction and Management Council ti listaan dagiti proyekto nga inaprobaran ni Gob. Matthew Marcos Manotoc a pakausaran ti 5.9 a milyon a pisos a nayun a pundo ti konseho kabayatan ti 2nd Quarter Provincial Disaster Risk Reduction Management Council meeting.
Segun ken ni Mr. Marcell Tabije, Local Disaster Risk Reduction and Management Officer ti gobierno probinsial ti Ilocos Norte, karaman ditoy ti crop rescue project ti Provincial Agriculture Office.
Inbatadna a ditoy a nailatang ti 650 ribu a pisos agsipud ta maysa daytoy kadagiti prayoridad ti gobernador.
Malaksid iti daytoy, kunana a gapu ta adu ti kaso ti rabies ditoy probinsia itay napalabas a tawen ket adda ti nailatang a pundo a maigatang ti anti rabies vaccine para kadagiti taraken nga aso, pusa ken dadduma pay nga usaren ti Provincial Veterinary Office para iti agtultuloy a panagbakunada kadagiti taraken.
Inpalgakna nga adda pay ti pundo a nailatang a maigatang iti “dengue tewst kits” ti Provincial Health Office gapu ta napinpintas met laeng no nasapsapa a maduktalan dagiti naapektaran ti dengue tapno dagus a mataming dagiti maseknan.
Inlawlawagna nga adda pay ti nailatang para iti emergency financial wenno shelter assistance a mausar kadagiti biktima ti didigra kangrunaanna kadagiti nadadaelan ti balay pakairamanan dagiti nauraman a maigatang iti “construction materials” ken tulong pinansial tapno al-alisto a matarimaan dagiti nadadael a pagtaengan dagiti maseknan.
Inlawlawagna nga adda pay ti nailatang a nayun a pundo para iti pannakaiyestablisar dagiti Small Farm Reservoir ken dadduma pay a proyekto ti Sustainable Development Center nga agserbi nga “harvesting facility” iti panawen ti panagtutudo ken mausar dagiti mannalon apaman a madanon ti panawen ti tikag.
Kuna ni Tabije nga adda pay ti para iti nayun a food pack a mausar iti relief operations ken para kadagiti responders iti kanito a ma-activate ti Emergency Operation Center ti probinsia.
Innayonna a kalpasan nga inaprobaran ti Provincial Disaster Risk Reduction and Management Council ket maipresentar iti Sangguniang Panlalawigan ken apaman a maaprobaran ket maisaruno ti pannakaipagna dagiti papeles para iti pannakaipatungpal dagiti nasao a proyekto.
