LAOAG CITY – Nagkiddaw ti Provincial Disaster Risk Reduction and Management Office iti helicopter ti Philippine Airforce a tumulong a mangbirok kadagiti dua a mangngalap a nagpukaw kabayatan ti panagkalap da iti baybay iti ili ti Burgos.
Nabigbig dagitoy nga isuda Ryan Quintos, 34 ken ni Ruben Tinaza, 38, agpada a residente iti Barangay Ablan iti nasao nga ili.
Inbatad ni Marcel Tabije, mangidadaulo ti PDRRMO a nakikoordinar dan kadagiti maseknan nga ahensya kas ti Philippine Coast Guard, PNP, Philippine Navy ken Philippine Air Force.
Basar met kenni Brgy. Chairman Celerino Abad iti Brgy. Ablan iti nasao nga ili, sakbay a nagpugpukaw dagiti dua ket nakatawag pay laeng ni Quintos kenni asawana ken naibaga na a natukkol ti takkaway ti nagluganan da a bilog.
Maipalagip a nagturong iti baybay dagiti nasao a mangngalap itay parbangon babaen ti panaglugan da ti maysa a bilog nga agmaris ti berde tapno mapan da agkalap.
Insigida nga inpakaammo ti asawa ni Quintos iti barangay da ket dagus met a napan nagrescue dagiti kabaranggayan da.
Kuna ni Abad a nakita da dagiti dua iti taaw ngem saan da dagitoy nakamatan gapu ta napigsa ti angin ken ayus ti danum.
Rumrumuar a napattog ti nagluganan a bilog dagiti mangngalap ken agpapan ita ket saan pay nga ammo ti ayan da.
Iti agdama, agtultuloy iti search and rescue operation kadagiti dua a mangngalap.
