LAOAG CITY – Inpakaammo ni Mayor Bryan Alcid a dakkel nga isyu kadagiti legal nga agup-upa wenno aglaklako iti merkado publiko ditoy ciudad ti Laoag dagiti agtaud wenno pop-up vendors ken dagiti peddlers nangnangruna iti ruwar ti tiendaan.
Kunana a maysa daytoy kadagiti naipadanon kenkuana a problema kabayatan ti panagbisita na iti merkado publiko iti kallabes.
Inbatad ti mayor a basar kadagiti agup-upa ti pwesto na iti tiendaan, maatiwan da isut gapuna a nakisarita iti Business Permit and Licensing ken Philippine National Police-Traffic Division tapno siguradwen a dagiti laeng market vendors ti mabalin nga aglako iti bisinidad ti merkado publiko.
Inlawlawag na nga uray dagiti peddlers ket nakisarita da a masapol nga iti laeng naipalubos a pagpwestoan da ti paglakoan da ken saan da a mabalin ti umakar-akar.
Innayon ti mayor a kayat amin dagiti maseknan ti agnegosyo ngem masapol a maisimpa a nasayaat dagitoy tapno awan ti tumaod a problema.
Mainaig iti daytoy, inpakaammo ni Mayor Alcid a mangisayangkat ti Business Permit and Licensing Office iti business mapping tapno maiyurnos amin dagiti aglaklako iti merkado publiko ditoy ciudad.
