LAOAG CITY – Nagballaag ti Hawaii Police Deparment gapo ti panagraira ti peke a kuwarta idiay Big Island iti nasao nga isla.
Daytoy ti inbatad ni Bombo International Correspondent Manny Pascua.
Segun kenni Pascua, 100 ken 20 dollar bill ti agwarwaras a peke a kuwarta ken naduktalan daytoy iti maysa a paggasolinaan ken fast food chain.
Mainaig iti daytoy, pinalagipan dagiti otoridad dagiti umili ken turista a kitaen da a naimbag dagiti maisupsupli kadakuada.
Kabayatanna, napasamak manen ti ginginned a napigsa ti 5.3 magnitude iti bunganga ti Kiluea Volcano iti nasao a lugar a sinaruno panagipugso na ti asok ken dapo.
Kunana a daytoyen ti maikawalo nga aldaw a nagsasaruno a napasamak ti panagbettak no sadinno a nagsasaruno a nagpigsa ti magnitude 5 agpangato.
Mainaig iti daytoy, naiget a kitkitaen dagiti siyentista no apay a mapaspasamak ti nagsasaruno a panaggingined iti uneg ti walo nga aldaw.
Innayon na nga awan ti naireport a nadadael a pagtaengan kalpasan ti pasamak.
