LAOAG CITY – Inpasigurado da Bombo International News Correspondent Peter Portugues, Melinda Natividad ken Rowena Calamaan a nagtalinaed a natalged ti kasasaad da idiay Israel iti baet ti mapaspasamak a tensyon iti nagbaetan da iti Iran.
Segun ken ni Portugues, iti kinabayag na nga agtrabtrabaho idiay Israel ken adon dagiti gubat a napasamak ket awan dagiti employer a mangbalakad kadakuada nga agawid da laengen ditoy Pilipinas.
Daytoy ket gapu ta kampante ken agtalek da a kabaelan dagiti Israeli Forces a salakniban dagiti sibilyan aglalo ket adda pay ti Iron Dome a mang-intercept ken mangdadael kadagiti short-range rockets ken artillery shells nga aggapo iti Iran.
Inpetteng ni Portugues a mabalin a dagiti agaw-awid a Pilipino ket possible a matrauma ken ma-stress da, aglalo ket ado dagiti agwarwaras a peke a damag mainaig iti mapaspasamak a tensyon iti nagbaetan ti Israel ken Iran.
Innayon na a gapu kadagiti maed-edit a video a mabuya ti pamilya ditoy Pilipinas ket saan a maliklikan a makarikna da ti panagdandanag a possible a mangpilit kadagiti kapamilya da nga agtrabtrabaho iti Israel nga agawid laengen iti pagilian.
Inpetteng pay ni Portugues a saan a matay ti bomba dagiti dadduma a Pilipino no di ket matay ti nerbiyos ken stress gapu kadagiti peke a damag.
Kabayatanna, agpada met a nagpanawagan da Natividad ken Calamaan a saan koma a basta mamati kadagiti mabuybuya ken maipadpadamag iti online gapu ta kasapulan nga iberipkar nga umuna no dagitoy ket pudno wenno saan.
Kuna pay ni Natividad a napintas ti panangtrato ti Israel kadagiti foreign workers da isut gapuna a kampante da met nga agtultuloy nga agtrabaho iti nadakamat a pagilian.
Inbalakad pay ni Natividad a ti laeng kasapulan nga aramiden ket sumurot kadagiti pagannurutan ken no adda ti maawat a pakaammo wenno ballaag maipapan iti panagipabanto ti Iran iti missiles ket agturung nga insigida iti bomb shelter ken iserra a nasayaat.
