LAOAG CITY – Nakagun-od ti world record ti pelikula a “Deadpool & Wolverine” gapu iti naiyuswat a drone show no sadinno nagusar ti rinibu a drones.
Kinumpirmaran ti records keeping organization a Guinness World Records a ti nasao a drone show nga inisponsoran ti Marvel ken Sky Elements ti baro a world record holder ti titulo a “Largest Aerial Display of a Fictional Character Formed by Drones.”
Daytoy ket kalpasan a nagusarda ti 1,599 a drones tapno mabukel ti imahe ti karakter a ni Deadpool iti tangatang.
Nupay kasta idi rabii met laeng iti nasao nga aldaw, na-break-da ti bukudda a rekord idi makabukelda ti imahe ni Wolverine usar ti 1,607 a drones.
Basar iti kompania nga agtagikua kadagiti drones nga Sky Elements, saan a daytoy ti maudi a daras a makagun-odda ti world record ken kadagiti sumarsaruno a bulan ket mabalinda a maabak ti bukudda a world record.
