LAOAG CITY – Kinumpirmaran ti Pentagon a saan a bumaba iti sangapulo a ribu dagiti suldado ti North Korea ti naipatulod idiay Russia.
Inbatad ni Pentagon Spokesperson Sabrina Singh a mabalin a manayonan pay daytoy kadagiti sumaruno nga aldaw.
Naammoan a dagiti immuna a naipatulod a suldado ti North Korea ket nangrugin a nagsanay iti akin-daya a paset ti Russia.
Naidestino dagitoy iti asideg iti border-da ti Ukraine.
Rumrummuar a dagiti nadakamat a suldado ket isu ti nayon a manglaban kontra iti Ukraine.
Inlawlawag met ni South Korean President Yoon Suk-yeol a daytoy nga inaramid ti North Korea ket maysa a pangta saan laeng iti national security ti pagilian no di ket pakairamanan pay iti international community.
Immunan a naglikudan ti Russia iti nasao nga alegasion.
