LAOAG CITY – Ilunglungalong ni Sen. Francis “Kiko” Pangilinan ti maysa a rakurak a panangamyendar iti Urban Development and Housing Act of 1992 wenno ti Republic Act No. 7279 tapno pagbalinen nga institusional ti programa a pabalay a nakasentro iti publiko.
Kalikagum ti nasao a lungalong a linteg a maikkan dagiti informal settler family ti natalged ken nalaka a pagtaengan nga asideg iti komunidadda.
Segun ken ni Pangilinan, masapol a tuladen dagiti reporma ti housing approach nga indauloan ti dati a DILG Secretary Jesse Robredo.
Inlawlawag ti Senador a dagiti informal settler ken dagiti sumagmamano a partner-NGOs ket naaddaan ti on-site ken on-city housing project idiay Naga idi agturturay ni Jesse Robredo.
Innayonna pay a babaen kadaytoy a proyekto, saanen a maiyakar iti adayo dagiti agtaltalinaed kadagiti naririsgo a lugar.
Kabayatanna, inpetteng ni Pangilinan a kalikagum ti nasao a lungalong a linteg a makissayan ti epekto ti climate change kadagiti informal settler families babaen iti panangipaay kadakuada ti natalged ken climate-resilient a relocation sites.
