LAOAG CITY – Mairekreklamo ti maysa a perdi a kotse a nabayagen a naka-parking iti kalsada iti Barangay 9 ditoy siudad ti Laoag gapu ta mangitunda ti nairot a taray ti trapiko.
Segun ken ni Barangay Chairman Jonathan Caday iti nasao a barangay, saanna a kabagian ti akinkukua ti nasao a kotse ngem inpasingkedna a maikkat ti lugan iti kabiitan a panawen tapno masolbar ti arungaing dagiti sumagmamano a residente ken motorista.
Inbatadna a kasaritananto ti akinkukua ti kotse tapno maipakada met laeng kenkuana ti pannakaikkat ti lugan iti kalsada.
Inlawlawagna a saan a daytoy ti damo nga adda ti kastoy a reklamo ti naawatna no diket addan dagiti immun-una pay no sadinno a naikkan pay ti ticket dagitoy kas pannusa.
Immuna iti daytoy, adda ti naawat a reklamo ti Bombo Radyo Laoag babaen ti ipa-Bombo segment a maproblemaan dagiti sumagmamano a tricycle drivers a dumaldalyasat iti Zamora Street iti Barangay 9 ditoy siudad ti Laoag gapu ta adda ti nadadael a kotse a makaabbeng iti kalsada a mangitunda ti panagirot ti taray ti trapiko.
