LAOAG CITY – Inlawlawag ni Senate President Vicente “Tito” Sotto III nga awan pay ti permanente a nadutukan a Chairman iti Senate Blue Ribbon Committee kalpasan ti panagikkat ni Senate President Pro Tempore Panfilo “Ping” Lacson.
Segun kenni Senator Sotto, agsasarita danto pay laeng apaman a makasangpet ni Senator Erwin Tulfo manipud iti opisyal a panagbiahe na iti sabali a pagilyan.
Iti agdama, ni pay laeng Senator Tulfo ti agserserbi kas acting chairperson iti nasao a komite gapo ta daytoy ti vice chairperson.
Maipalagip nga inbatad da Senator Tulfo ken Senator Pia Cayetano a saan da a kayat no isuda ti madutukan kas mangidaulo iti Senate Blue Ribbon Committee.
Kabayatanna, immuna metten a saan nga inawat da Senador Francis “Kiko” Pangilinan, JV Ejercito, ken Raffy Tulfo ti nasao a chairmanship.
Awan pay met ti komento ni Senator Risa Hontiveros no interesado nga agbalin a Senate Blue Ribbon Committee chairperson gapo ta maysa pay isuna kadagiti innaganan ni Sotto a pagpilyan da.
