LAOAG CITY – Mamati da Manila 3rd district Representative Joel Chua ken Tingog Party-list Representative Jude Acidre a nasken a resolbaren latta ti impeachment court ti pannusa a perpetual disqualification from public office kontra ken ni Vice President Sara Duterte no bilang agikkat daytoy iti puesto.
Inbatad ni Chua a miembro ti House Prosecution Team, uray aglusulosen iti puesto ni Vice President Sara sakbay a maaddaan ti resolusion ti impeachment court iti panangtingiting daytoy ket rumbeng latta a maresolbar ti kiddaw ti Kamara a mapatawan daytoy ti perpetual disqualification from public office.
Para met ken ni Representative Acidre, no bilang bumaba iti pesto ti Bise Presidente ket kasapulan latta nga ituloy ti Senado ti panangtingiting gapu ta daytoy ket maiyataday iti Konstitusion.
Kuna pay ni Acidre ti impeachment case ket saan a mabalin a saan nga ikankano gapu ta saan laeng a maipapan daytoy kadagiti pulitiko no di ket para iti pagilian.
