LAOAG CITY – Manamnama nga ilunglungalong ni Senador Raffy Tulfo ti gakat a mangpangato iti Personnel Economic Relief Allowance (PERA) nga ipaay ti gobierno kadagiti empleado ti gobierno.
Ti Personnel Economic Relief Allowance ket binulan nga allowance malaksid iti kangrunaan a sueldo dagiti empleado ti gobierno.
Nailanad daytoy iti Senate Bill 2673 a panggepna nga ipangato ken automatiko nga i-adjust ti mekanismo kadagiti pinansial a benepisio a maited kadagiti empleado ti gobierno tapno makatubay iti kanayon nga umad-adu a presio dagiti tagilako.
Segun ken ni Tulfo, malaksid iti panangipaay iti kanayonan a tulong kadagiti public servants, ket mapapigsa pay ti singasing ti sapasap nga efficiency dagiti empleado ti gobierno.
Innayon ti senador a ti Personnel Economic Relief Allowance ket agbalin a napateg a financial support mechanism para kadagiti empleado ti gobierno a makatulong kadakuada iti ngumatngato a gastos ti panagbiag ken tapno mataginayon ti kinatalged ti ekonomia.
