LAOAG CITY – Inbatad ni Mayor Mariano Antonio iti ili ti Marcos nga arigna amin nga agpapaay iti Rural Health Unit (RHU) iti nasao nga ili ket nagpositibo ti covid-19.
Kuna ti mayor a dua laeng nga empleado iti RHU ti negatibo ti resulta ti rt-pcr test na.
Gapu iti daytoy, inbaga ti mayor a dagiti umili nga agkasapulan ti serbisyo ti RHU ket agturong da laeng iti Doña Josefa Edralin Marcos District Hospital iti nasao nga ili.
Innayon na nga ita nga aldaw ket awan ti naiwayat a contact tracing ita nga aldaw gapu iti panagpositibo ti kaadoan nga empleado iti RHU.
Gapu iti daytoy, inbaga ti mayor a kiddawen da ti tulong ti gobierno probinsyal para iti pannakaiwayat ti contact tracing iti nasao nga ili.
Kabayatanna, inpakaammo pay ti mayor nga uray ti munisipyo iti ili ti Marcos ket nagtalinaed a nakaserra kalpasan nga arigna amin a departamento ket adda ti empleado na a nagpositibo ti covid-19.
Iti agdama, adda ti 94 nga active cases iti ili ti Marcos.
