LAOAG CITY – Nakasagana ti Public Employment Service Office ditoy siudad ti Laoag a mangasistir kadagiti Overseas Filipino Workers nga agsubli ditoy pagilian gapu iti agtultuloy a mapaspasamak a gubat idiay Middle East.
Inbatad ni Ms. Shey Pia Abaya, mangidadaulo iti nasao nga opisina, daytoy ket wagas iti agtultuloy a panangikagumaan a mangprotekta ken mangasistir kadagiti maibilang a moderno a bannuar.
Inlawlawagna a ti PESO Migrant Desk ket mangipaay ti nagduduma a serbisio kadagiti sumangpet nga Overseas Filipino Worker pakairamanan ti transportation assistance a mai-deploy iti Laoag International Airport ken kadagiti bus terminal a mangitulod kadagitoy iti pagtaenganda ditoy siudad ti Laoag.
Kunana nga adda pay ti medical transport assistance para kadagiti agkasapulan ti insigida a medical care.
