LAOAG CITY – Mangnamnama ni Mrs. Lizette Atuan, ti mangidadaulo ti Provincial Public Employment Service Office ti panangaprobar ti Regional Office ti TESDA a maiyuswat ti electronics product assembly ditoy Ilocos Norte.
Inlawlawagna a daytoy ket kalpasan nga adda dagiti kakailian a nangipadanon iti gobierno probinsial ti kalikagumda a dumalan iti panagsanay.
Kunana a karaman kadagiti kalkalikaguman dagiti kakailian a maisayangkat a panagsanay ket ti electronics product assembly.
Nupay kasta, inpakaammona nga iyur-uray ti gobierno probinsial ti pakaammo ti Technical Education and Skills Development Authority wenno TESDA no ania dagiti Skills Training nga isayangkatda ita a tawen.
Mainaig iti daytoy, segun ken ni Atuan, a naipadanonnan iti baro a provincial director ti TESDA ditoy Ilocos Norte ti naiget a kalikagum ti Gobierno Probinsial a maitultuloy ti maiyus-uswat a programa ken ti nasao nga ahensia a mangisayangkat ti panagsanay para kadagiti kakailian.
Inbatadna a babaen iti daytoy ket ad-adu pay a kakailian ti matulungan tapno adda ti maipaadal kadakuada a mabalindanto nga usaren wenno iyaplikar kadagiti mabirukanda a pagtrabahoan.
Innayonna a kas paset iti tarigagay ti Gobierno Probinsial a maipaayan ti pamastrekan dagiti kakailian ken malaksid iti idadalanda iti panagsanay ket maipaayan pay dagitoy iti start-up kit ken “working capital.”
