LAOAG CITY – Inbasura ti Korte Suprema ti petision nga inpasa ni dati a Presidential Spokesperson Atty. Harry Roque kontra iti Quad Committee ti Kamara de Representantes a nangimbestigar idi iti Philippine Offshore Gaming Operators (POGO).
Iti desision nga insurat ni Associate Justice Samuel Gaerlan, inbasura ti Korte Suprema ti petision ni Roque tapno lappedan ti panangarestar kenkuana ken pawilan ti Quad Committee nga agatendar isuna kadagiti panagdengngeg iti masangoanan ken agisubmitir kadagiti kidkiddawen a dokumento.
Nakailanad iti desision a moot ti petition for certoriari and prohibition ni Roque nangruna ket nalpasen ti 19th Congress iti napalabas a tawen ken inbabawi ti contempt order kenkuana.
Idi 2024 idi ag-convene ti Quadcomm tapno imbestigaran dagiti iligal nga aktibidad a maikonkonektar iti operasion ti Philippine Offshore Gaming Operators iti pagilian.
Naimbitaran iti panagdengngeg ti dati a sekretario ngem naminsan laeng a daras isuna a nagatendar ken nangipasa daytoy ti mosion tapno iwaswas ti bileg ti subpoena kontra kenkuana.
Inbatad ni Roque, inpasana ti petision gapu nalabsing dagiti karebbenganna.
Basar iti Korte Suprema, maibilangen a moot ti maysa a kaso no awanen ti agbalin nga epekto ti maysa a ruling kas ti napasamak ken ni Roque kagiddan ti panaglippas dagiti panagdengngeg ken panag-adjourn ti maika-19 a Kongreso.
