LAOAG CITY – Naiyulin iti Korte Suprema ti petisyon a mangkanselar iti certificate of candidacy (COC) ni presumptive president Ferdinand “Bongbong” Marcos Jr. iti Eleksyon 2022.
Nailanad ditoy ti pannakaiparuk-at ti temporary restraining order (TRO) tapno maisardeng ti panagbilang ti butos ken ti proklamasyon.
Kiniddaw dagiti petitioners ket isuda Father Christian Buenafe, Fides Lim, Ma. Edeliza Hernandez, Celia Lagman Sevilla, Roland Vibal, ken Josephine Lascano a mangisyu ti kangatoan a korte ti TRO a manglapped iti Senado ken House of Representatives iti canvassing iti butos ni Marcos ken ti posible a pannakaiproklamar na.
Inpetteng dagitoy a ti eleksyon ket maibilang laeng a numbers game ken ti panangipeksa dagiti tattao ti kalikagom da babaen iti balota ket saan nga isu ti mangpunas iti vice of ineligibility.
Inbatad pay dagitoy a ti TRO manipud iti Korte Suprema ket isu laeng ti remedyo a makitkita da.
Maipalagip nga inbasura ti Comelec en banc ti petisyon a mangkanselar iti kandidatura ni Marcos Jr.
